• Home
  • ಪ್ರಧಾನ ಸುದ್ದಿ
  • ಮಾಧ್ಯಮಗಳಿಗೆ ಮೂಗುದಾರ, ‘ಲೋಕಸಭಾ ಮಾದರಿ’ಯಲ್ಲಿ ಕಲಾಪ ಪ್ರಸಾರಕ್ಕೆ ಚಿಂತನೆ
ಪ್ರಧಾನ ಸುದ್ದಿ ಮುಖ್ಯಾಂಶಗಳು

ಮಾಧ್ಯಮಗಳಿಗೆ ಮೂಗುದಾರ, ‘ಲೋಕಸಭಾ ಮಾದರಿ’ಯಲ್ಲಿ ಕಲಾಪ ಪ್ರಸಾರಕ್ಕೆ ಚಿಂತನೆ

ಬೆಂಗಳೂರು: ‘ಲೋಕಸಭಾ ಮಾದರಿ’ಯಲ್ಲಿ ವಿದ್ಯುನ್ಮಾನ ಮಾಧ್ಯಮಗಳಿಗೆ ಮಾಹಿತಿ ಪೂರೈಕೆ ಮಾಡುವ ವಿವಾದಾತ್ಮಕ ನಿರ್ಧಾರಕ್ಕೆ ಸ್ಪೀಕರ್‌ ವಿಶ್ವೇಶ್ವರ ಹೆಗಡೆ ಕಾಗೇರಿ ಮುಂದಾಗಿದ್ದು, ಮುಂಬರುವ ವಿಧಾನಸಭಾ ಕಲಾಪ ಸಂದರ್ಭದಲ್ಲೇ ಜಾರಿಗೆ ತರಲು ಚಿಂತನೆ ನಡೆಸಿದ್ದಾರೆ.

ರಾಜ್ಯದಲ್ಲಿಈ ಹಿಂದೆ ಬಿಜೆಪಿ ಸರಕಾರ ಅಧಿಕಾರದಲ್ಲಿದ್ದ ಸಂದರ್ಭದಲ್ಲೇ ಲೋಕಸಭಾ ಮಾದರಿ ಜಾರಿಗೆ ಚರ್ಚೆ ನಡೆದಿತ್ತು. ಆದರೆ ಮಾಧ್ಯಮ ಹಾಗೂ ಪ್ರತಿಪಕ್ಷಗಳಿಂದ ವಿರೋಧ ವ್ಯಕ್ತವಾದ ಹಿನ್ನೆಲೆಯಲ್ಲಿಅಂದಿನ ಸ್ಪೀಕರ್‌ ಕೆ.ಜಿ. ಬೋಪಯ್ಯ ಪ್ರಸ್ತಾಪ ಕೈ ಬಿಟ್ಟಿದ್ದರು. ಕಾಂಗ್ರೆಸ್‌ ಅಧಿಕಾರಾವಧಿಯಲ್ಲಿ ಮಾಧ್ಯಮ ನಿಯಂತ್ರಣಕ್ಕೆ ಮುಂದಾದ ಮಾಜಿ ಸ್ಪೀಕರ್‌ ಕೋಳಿವಾಡ ಕೂಡಾ ಈ ಬಗ್ಗೆ ಚಿಂತನೆ ನಡೆಸಿದ್ದರೂ ಜಾರಿ ಮಾಡಿರಲಿಲ್ಲ. ಈಗ ಬಿಜೆಪಿ ಸರಕಾರ ಅಧಿಕಾರಕ್ಕೆ ಬಂದ ನಂತರ ಸ್ಪೀಕರ್‌ ಕಾಗೇರಿ ಈ ಬಗ್ಗೆ ಚಿಂತನೆ ನಡೆಸಿರುವುದು ವಿವಾದಕ್ಕೆ ಕಾರಣವಾಗಿದೆ.

ಆದರೆ ಮೂಲಗಳ ಪ್ರಕಾರ ಇದು ವಿದ್ಯುನ್ಮಾನ ಮಾಧ್ಯಮ ಕ್ಯಾಮೆರಾಗಳಿಗೆ ಮಾತ್ರ ಅನ್ವಯವಾಗಲಿದ್ದು, ವರದಿಗಾರರು ಹಾಗೂ ಮುದ್ರಣ ಮಾಧ್ಯಮ ಪ್ರತಿನಿಧಿಗಳ ಕಲಾಪ ವೀಕ್ಷಣೆ ಹಾಗೂ ವರದಿಗಾರಿಕೆಗೆ ನಿಯಂತ್ರಣ ಹೇರುವ ಉದ್ದೇಶ ಹೊಂದಿಲ್ಲ ಎಂದು ತಿಳಿದು ಬಂದಿದೆ. ಅಧಿವೇಶನದ ಕಾರ್ಯ ಕಲಾಪದ ಬಗ್ಗೆ ವಿವರಣೆ ನೀಡಲು ಬುಧವಾರ ಸ್ಪೀಕರ್‌ ಕಾಗೇರಿ ಪತ್ರಿಕಾಗೋಷ್ಠಿ ನಡೆಸಲು ನಿರ್ಧರಿಸಿದ್ದು , ಆ ಸಂದರ್ಭದಲ್ಲಿ ಲೋಕಸಭಾ ಮಾದರಿಯಲ್ಲಿ ಕಲಾಪ ನೇರ ಪ್ರಸಾರ ಮಾಡುವ ಬಗ್ಗೆ ಮಾಹಿತಿ ನೀಡಲಿದ್ದಾರೆ.

ಏನಿದು ಲೋಕಸಭಾ ಮಾದರಿ:
ರಾಜ್ಯ ವಿಧಾನಸಭೆ ಹಾಗೂ ಪರಿಷತ್‌ ಕಲಾಪವನ್ನು ಸಂಪೂರ್ಣ ನೇರ ಪ್ರಸಾರಕ್ಕೆ ಈಗ ಅವಕಾಶವಿದೆ. ಆದರೆ ಲೋಕಸಭೆ ಸೇರಿದಂತೆ ಕೆಲ ರಾಜ್ಯಗಳಲ್ಲಿ ಇದಕ್ಕೆ ಅವಕಾಶವಿಲ್ಲ. ಶಾಸಕರು ಆಕಳಿಸಿದ್ದು, ಮೊಬೈಲ್‌ ವೀಕ್ಷಿಸಿದ್ದು, ಗುಟ್ಕಾ ಸೇವಿಸಿದ್ದೆಲ್ಲವೂ ನೇರ ಪ್ರಸಾರಗೊಂಡ ಹಿನ್ನೆಲೆಯಲ್ಲಿ ಕಲಾಪ ಸಂದರ್ಭದಲ್ಲಿ ಮಾಧ್ಯಮ ನಿಯಂತ್ರಿಸುವ ಬಗೆ ಹೇಗೆ? ಎಂದು ಹಿಂದಿನಿಂದಲೂ ಚರ್ಚೆ ನಡೆಯುತ್ತಿದೆ. ಲೋಕಸಭೆಯ ಕಲಾಪಗಳ ನೇರ ಚಿತ್ರೀಕರಣಕ್ಕೆ ಅವಕಾಶವಿಲ್ಲವಾದರೂ ಸಾರ್ವಜನಿಕ ಹಿತಾಸಕ್ತಿ ದೃಷ್ಟಿಯಿಂದ ದೃಶ್ಯಾವಳಿಗಳು ಮಾಧ್ಯಮಕ್ಕೆ ಲಭಿಸುವಂತೆ ಅವಕಾಶ ಕಲ್ಪಿಸಲಾಗಿದೆ. ಇದೇ ಮಾದರಿ ಅನುಷ್ಠಾನಕ್ಕೆ ಈಗ ಚಿಂತನೆ ನಡೆಸಲಾಗಿದ್ದು, ವಿಧಾನಸಭೆ ಗ್ಯಾಲರಿಗೆ ಕ್ಯಾಮರಾ ಪ್ರವೇಶಕ್ಕೆ ನಿಷೇಧ ಹೇರಲಾಗುತ್ತದೆ ಎಂದು ತಿಳಿದು ಬಂದಿದೆ.

ಇ-ವಿಧಾನ್‌: ವಿಧಾನಮಂಡಲ ಕಲಾಪವನ್ನು ಸಂಪೂರ್ಣ ಡಿಜಿಟಲೀಕರಣಗೊಳಿಸುವ ಬಗ್ಗೆ ಹಂತ ಹಂತವಾಗಿ ಯೋಜನೆ ರೂಪಿಸಲಾಗುತ್ತಿದೆ. ಕೇಂದ್ರ ಸರಕಾರದ ಧನ ಸಹಾಯದೊಂದಿಗೆ ‘ಇ-ವಿಧಾನ್‌ ‘ ಜಾರಿಯಾಗುತ್ತಿದ್ದು, ಹಿಮಾಚಲ ಪ್ರದೇಶದ ಬಳಿಕ ಅನುಷ್ಠಾನದಲ್ಲಿ ಕರ್ನಾಟಕ ದ್ವಿತೀಯ ಸ್ಥಾನದಲ್ಲಿದೆ. ಇದರ ಭಾಗವಾಗಿ ಈಗಾಗಲೇ ಕಲಾಪದ ವೆಬ್‌ ಕಾಸ್ಟಿಂಗ್‌ ನಡೆಸಲಾಗುತ್ತಿದೆ. ಹೀಗಾಗಿ ಮಾಧ್ಯಮಗಳಿಗೆ ಮಾಹಿತಿ ರವಾನೆ ಕಷ್ಟವಾಗಲಾರದು ಎಂಬ ಅಭಿಪ್ರಾಯವನ್ನು ವಿಧಾನಸಭೆ ಸಚಿವಾಲಯ ಹೊಂದಿದೆ.

ಹಾಗಂಥ ಮಾಧ್ಯಮ ನಿಯಂತ್ರಣಕ್ಕೆ ಸ್ಪೀಕರ್‌ ಕಾರ್ಯಾಲಯ ಪ್ರಯತ್ನ ನಡೆಸಿದ್ದು ಇದೇ ಮೊದಲಲ್ಲ. ಕಾಗೋಡು ತಿಮ್ಮಪ್ಪ ಹೊರತುಪಡಿಸಿ ಕಳೆದ ಹತ್ತು ವರ್ಷದ ಅವಧಿಯಲ್ಲಿ ಸ್ಪೀಕರ್‌ ಸ್ಥಾನ ಅಲಂಕರಿಸಿದವರೆಲ್ಲರೂ ಈ ಬಗ್ಗೆ ಪ್ರಯತ್ನ ನಡೆಸಿದ್ದಾರೆ. ವರದಿಗಾರರನ್ನು ಗ್ಯಾಲರಿಗೆ ಮಾತ್ರ ಸೀಮಿತಗೊಳಿಸಲು ವಿಧಾನಪರಿಷತ್‌ ಸಭಾಪತಿ ಡಿ.ಎಚ್‌. ಶಂಕರಮೂರ್ತಿ ಈ ಹಿಂದೆ ಯತ್ನಿಸಿದ್ದರು.

Related posts

ಉಪಚುನಾವಣೆಗೆ ಮತ್ತೆ ಮುಹೂರ್ತ ಫಿಕ್ಸ್

Kannadigara Prajanudi

ಡಿಕೆಶಿ ಅಕ್ರಮ ಹಣ ಪತ್ತೆ ಪ್ರಕರಣ: ಕಾಂಗ್ರೆಸ್‌ ಶಾಸಕಿ ಲಕ್ಷ್ಮೀ ಹೆಬ್ಬಾಳ್ಕರ್‌ಗೆ ಸೋಲಾರ್‌ ಶಾಕ್‌, ಇ.ಡಿ. ಕೇಳಿದ ನಾಲ್ಕು ಪ್ರಶ್ನೆಗೆ ಕಂಗಾಲು

Kannadigara Prajanudi

ಕೇಂದ್ರ ಸರಕಾರದ ದಿಟ್ಟ ಕ್ರಮ: ಔಷಧ ಬೆಲೆ ಇನ್ನಷ್ಟು ಅಗ್ಗ?

Kannadigara Prajanudi

Leave a Comment